ErasmusDays 2024 jiċċelebra r-rwol ta' Erasmus+ b'eluf ta' avvenimenti madwar l-Ewropa

Mill-14 sad-19 ta’ Ottubru, #ErasmusDays 2024 se jenfasizza l-impatt pożittiv tal-programm Erasmus+ fuq l-edukazzjoni, it-taħriġ, iż-żgħażagħ u l-isport. Aktar minn 10,000 avveniment, kemm personalment kif ukoll online, huma ppjanati madwar id-dinja biex jiċċelebraw il-kisbiet tal-programm, juru s-suċċessi tiegħu u jqajmu kuxjenza dwar l-opportunitajiet li joffri lill-istudenti. Se jieħdu sehem eluf ta’ studenti, apprendisti, studenti adulti u kowċis sportivi.

B'aktar minn 15-il miljun parteċipant sal-lum, il-programm Erasmus+ huwa wieħed mill-inizjattivi Ewropej l-aktar popolari u l-pedament taż-Żona Ewropea tal-Edukazzjoni.

Il-Kummissarju għall-Innovazzjoni, ir-Riċerka, il-Kultura, l-Edukazzjoni u ż-Żgħażagħ Iliana Ivanova qalet: “Erasmus+ ikompli jispira, jiftaħ il-bibien u jittrasforma l-ħajja ta’ miljuni ta’ nies. ErasmusDays 2024 jiċċelebra s-suċċess immens ta’ dan il-programm emblematiku tal-UE u jixgħel dawl fuq l-ispirtu ta’ għaqda u kollaborazzjoni li jiddefinixxi l-Ewropa. Inħeġġeġ lil kulħadd biex jieħu sehem f’dawn l-eluf ta’ avvenimenti, li juru l-qawwa li tgħaqqad l-edukazzjoni, l-isport u l-kultura.”

Imnedija fl-2017, ErasmusDays issa jiċċelebra Erasmus+ madwar id-dinja. Wara l-Logħob Olimpiku u Paralimpiku f'Pariġi, it-tema ta' din is-sena hija r-rwol tal-isport fil-promozzjoni tal-kooperazzjoni internazzjonali u l-iskambju kulturali. Fl-2023, saru aktar minn 9,600 avveniment fi 53 pajjiż, u l-edizzjoni tal-2024 għandha l-għan li tkompli dan is-suċċess.

Aqsam dan l-artikolu: