Valuri u Identitajiet: Appoġġ kbir għall-valuri tal-UE fil-pajjiżi kollha tal-UE jgħid rapport ġdid tal-Kummissjoni

Iċ-Ċentru Konġunt tar-Riċerka (JRC) tal-Kummissjoni ppubblika rapport ġdid, li jenfasizza l-ħtieġa li jitqiesu l-valuri u l-identitajiet, bħall-ġustizzja soċjali, l-ugwaljanza jew is-sigurtà, meta l-politiki jiġu mfassla, evalwati u kkomunikati. Ir-rapport, sostnut minn stħarriġ ġdid tal-Ewrobarometru, juri li l-firda politika tradizzjonali fl-Ewropa, ibbażata fuq interess soċjoekonomiku, qed tinbidel lejn imġieba politika mmexxija minn valuri, attitudnijiet u identitajiet individwali.

Il-Viċi President tal-Valuri u t-Trasparenza Věra Jourová qalet: “Biex insaħħu l-fiduċja fid-demokrazija jeħtieġ li nifhmu d-diversità tal-valuri personali taċ-ċittadini u l-identitajiet tagħhom. Ir-riżultati minn Ewrobarometru ġdid – diskuss f’dan ir-rapport komprensiv – juru appoġġ kbir għall-valuri tagħna tal-UE. Madankollu, jeħtieġ li nifhmu wkoll l-ispettru sħiħ tal-valuri li għandhom iċ-ċittadini tal-UE. Dan se jgħin biex jintlaħqu riżultati ta' politika aħjar u titnaqqas il-polarizzazzjoni politika. Ir-rapport jissuġġerixxi modi innovattivi biex jirriflettu d-diversità tal-valuri taċ-ċittadini fit-tfassil tal-politika tal-UE.”

Il-Kummissarju għall-Innovazzjoni, ir-Riċerka, il-Kultura, l-Edukazzjoni u ż-Żgħażagħ Mariya Gabriel qalet: “Dan ir-rapport jipprovdi approċċ robust dwar kif torbot l-evidenza xjentifika mal-valuri u l-identitajiet taċ-ċittadini meta tiġi diskussa l-politika pubblika. Huwa importanti li dawk li jfasslu l-politika jikkunsidraw il-valuri u l-identitajiet, l-attitudnijiet u l-imġieba taċ-ċittadini. Li tkun taf u tindirizza t-tħassib taċ-ċittadini se tikkontribwixxi għall-iżvilupp ta’ politiki infurmati fuq l-evidenza.”

Skont ir-riżultati ta’ Ewrobarometru Speċjali li sar għar-rapport, il-valur tal-UE appoġġjat bl-aktar mod qawwi miċ-ċittadini huwa l-indipendenza tal-qrati u d-dritt għal proċess ġust, segwit mill-indipendenza tal-imħallfin. 82% ta’ dawk li wieġbu qablu li l-imħallfin għandhom ikunu indipendenti u m’għandhomx ikunu taħt l-influwenza ta’ ħaddieħor. L-identitajiet l-aktar importanti għaċ-ċittadini huma l-familja u l-identità nazzjonali tagħhom. Il-valuri hija wkoll tema li fuqha n-nies huma mitluba jaqsmu l-fehmiet tagħhom fuq fil-Konferenza dwar il-Futur tal-Ewropa, b’wieħed mill- Bordijiet taċ-Ċittadini Ewropej iddedikat għad-demokrazija/valuri u drittijiet Ewropej, l-istat tad-dritt, is-sigurtà. Aqra r-rapport sħiħ tal-JRC hawn u ingħaqad mal-avveniment tat-tnedija hawn. Sir af aktar dwar l-istħarriġ tal-Ewrobarometru tagħhae.

Aqsam dan l-artikolu: