Il-Kummissjoni u l-BEI jħabbru garanzija aktar flessibbli ta’ €5 biljun biex jagħtu spinta lill-investimenti globali

Fl-okkażjoni tar-4 Konferenza Internazzjonali dwar il-Finanzjament għall-Iżvilupp, il-Kummissjoni Ewropea u l-Bank Ewropew tal-Investiment (BEI) ħabbru tip ġdid ta’ ftehim ta’ garanzija li se jipprovdi sa €5 biljun biex inaqqas ir-riskju tal-investimenti u jespandi l-operazzjonijiet tal-BEI barra l-Unjoni Ewropea (UE).  

Il-garanzija għandha l-potenzjal li tiftaħ sa €10 biljun f'finanzjament għal proġetti kritiċi fl-enerġija nadifa, l-infrastruttura ekoloġika u l-aċċess għall-finanzi għal Intrapriżi Żgħar u Medji (SMEs) f'pajjiżi sħab. Il-garanzija se tappoġġja investimenti fl-enerġija, l-infrastruttura fiżika, ir-reżiljenza ekonomika u l-SMEs fit-Tramuntana tal-Afrika u l-Lvant Nofsani. Se tgħin ukoll biex tiffinanzja proġetti ta' infrastruttura tat-telekomunikazzjoni u tal-enerġija u tappoġġja l-muniċipalitajiet fir-reġjuni tat-tkabbir tal-UE u tal-Viċinat tal-Lvant, u b'hekk tikkontribwixxi bil-qawwa għall-prijoritajiet tal-adeżjoni tal-UE.  

Din il-garanzija l-ġdida hija mfassla biex tappoġġja numru akbar ta’ entitajiet – kumpaniji b’parteċipazzjoni statali jew organizzazzjonijiet pubbliċi – li joperaw fil-livelli lokali jew reġjonali f’pajjiżi sħab barra mill-UE. In-novità tal-garanzija l-ġdida tal-lum hija li tista’ tapplika wkoll għal entitajiet li jisselfu flus mis-swieq finanzjarji bit-termini tagħhom stess – mingħajr appoġġ statali. Fl-istess ħin, il-garanzija se tippermetti pereżempju l-iżvilupp tal-Kuritur Transkaspjan fl-Asja Ċentrali, ittejjeb is-sigurtà tal-katina tal-provvista għal materja prima kritika u tavvanza l-Aġenda ta’ Investiment tal-Global Gateway fl-Amerika Latina u l-Karibew.

Aktar informazzjoni hija disponibbli fl-istqarrija għall-istampa tagħna fuq l-internet.

Aqsam dan l-artikolu: