L-esportazzjonijiet tal-UE taċ-ċanga lejn #Korea jerġgħu jibdew wara kważi 20 snin

Il-Kummissarju għall-Kummerċ Cecilia Malmström, qalet: “Il-kummerċ mhuwiex biss li jsir ftehimiet kummerċjali. Wara ħafna snin ta’ xogħol iebes din it-tħabbira tfisser li l-bdiewa Olandiżi u Daniżi jiksbu suq ġdid biex ibigħu ċ-ċanga tagħhom. Għal darb'oħra l-UE qed tagħti riżultati għas-settur agrikolu tagħna.”

Il-Kummissarju Vytenis Andriukaitis, inkarigat mis-saħħa u s-sikurezza tal-ikel, laqa’ din l-aħbar, u saħaq li “dan huwa sinjal ieħor li l-imsieħba kummerċjali jirrikonoxxu li l-ġlieda kontra l-BSE ntrebħet u li l-kwalità taċ-ċanga u l-prodotti taċ-ċanga tal-UE hija rikonoxxuta madwar id-dinja. . Aċċess addizzjonali għal dan is-suq importanti hija aħbar eċċellenti għall-produtturi tal-UE!”

Il-Kummissarju għall-Agrikoltura Phil Hogan qal: “Dan huwa żvilupp tajjeb ħafna u dikjarazzjoni importanti ta’ fiduċja mill-awtoritajiet tal-Korea t’Isfel fis-sikurezza u l-kwalità taċ-ċanga Ewropea. Wara l-konferma tal-aċċess għall-operaturi Daniżi u Olandiżi, nittama li ma jgħaddix wisq żmien qabel ma l-operaturi fi Stati Membri oħra tal-UE jiġu approvati għall-esportazzjoni lejn dan is-suq importanti u siewi. L-iżgurar tal-aċċess għal Stati Membri oħra tal-UE se jkompli jkun prijorità għall-Kummissjoni Ewropea fir-relazzjonijiet kummerċjali bilaterali mal-Korea.”

Il-ftuħ tas-suq Korean kien possibbli grazzi għal sforzi konsistenti mwettqa b'mod konġunt mill-Kummissjoni Ewropea u l-Istati Membri tal-UE. It-tneħħija tar-restrizzjonijiet kummerċjali imposti fl-2001 b'reazzjoni għat-tifqigħa tal-enċefalopatija sponġiformi bovina (BSE) hija sinjal ta' fiduċja mistħoqqa fis-sistema komprensiva, b'ħafna saffi u effiċjenti ħafna tal-UE għall-kontroll tas-sikurezza tal-ikel u tas-saħħa tal-annimali. Il-Kummissjoni se tkompli taħdem mill-qrib mal-awtoritajiet Koreani biex tiżgura aċċess għas-suq għall-bqija tal-istati membri li għadhom qed jistennew l-approvazzjoni tal-esportazzjoni għaċ-ċanga u l-prodotti taċ-ċanga. Waqt laqgħa li saret fl-4 ta’ Settembru 2019 dwar kwistjonijiet sanitarji u fitosanitarji, l-awtoritajiet Koreani pprovdew assigurazzjonijiet li l-applikazzjonijiet pendenti mill-Istati Membri tal-UE (minbarra d-Danimarka u l-Olanda) jiġu pproċessati fil-ħin.

L-UE u l-Korea huma sa mill-2011 marbuta bi ftehim kummerċjali u l-Kummissjoni Ewropea tistenna bil-ħerqa li tiżgura li ż-żewġ partijiet ikunu kapaċi jirrealizzaw il-potenzjal sħiħ ta’ dan il-ftehim.

Il-ftehim kummerċjali bejn l-UE u l-Korea għen biex jintensifika l-iskambji, isolvi bosta impedimenti kummerċjali fuq iż-żewġ naħat u jżid il-kummerċ agroalimentari bilaterali b'10 % fis-sena. Issa, li r-restrizzjonijiet sanitarji fuq iċ-ċanga Daniża u Olandiża tneħħew, il-produtturi minn dawk il-pajjiżi fl-aħħar se jkunu jistgħu jgawdu t-tnaqqis tat-tariffi disponibbli taħt il-ftehim.

reklam

Aktar informazzjoni

Ir-relazzjonijiet kummerċjali bejn l-UE u l-Korea

Sistema tas-sikurezza tal-ikel tal-UE

Esportazzjonijiet agrikoli tal-UE