Ir-Repubblika tal-Madagaskar:-UE biex tosserva l-elezzjonijiet presidenzjali

Wara stedina mill-awtoritajiet tar-Repubblika tal-Madagaskar, l-Unjoni Ewropea qed tagħmel missjoni biex tosserva l-elezzjonijiet presidenzjali. L-ewwel rawnd huwa skedat għall-25 ta’ Ottubru. Il-Missjoni ta' Osservazzjoni Elettorali tal-Unjoni Ewropea (EU EOM) hija mmexxija minn Maria Muñiz de Urquiza, membru tal-Parlament Ewropew, li waslet f'Antananarivo fit-2 ta' Ottubru u se tniedi uffiċjalment il-missjoni waqt konferenza stampa fit-3 ta' Ottubru.

Tim ewlieni ta' 9 analisti elettorali tal-UE wasal f'Antananarivo fil-25 ta' Settembru. Magħhom se jingħaqdu 44 osservatur fit-tul fit-3 ta’ Ottubru u se jiġu rinfurzati minn 50 osservatur għal żmien qasir ftit jiem qabel jum l-elezzjoni. Fil-jum tal-elezzjoni se jingħaqdu mal-missjoni delegazzjoni tal-Parlament Ewropew kif ukoll membri bbażati lokalment tal-komunità diplomatika tal-UE. L-EOM tal-UE se tiskjera madwar il-pajjiż 'il fuq minn 100 osservatur (ġejjin minn 25 stat membru u min-Norveġja) fil-jum tal-elezzjoni.

Ftit wara jum l-elezzjoni, l-EOM se toħroġ dikjarazzjoni preliminari tas-sejbiet inizjali tagħha f'konferenza stampa f'Antananarivo. L-EOM se tibqa' fil-Madagaskar biex tosserva l-għadd finali tal-voti u kwalunkwe proċedura ta' ilmenti. Se tosserva wkoll l-elezzjonijiet leġiżlattivi skedati għall-20 ta' Diċembru u t-tieni rawnd possibbli tal-elezzjonijiet presidenzjali. L-EOM tal-UE se tħejji rapport finali li jinkludi rakkomandazzjonijiet li għandhom jiġu sottomessi lill-awtoritajiet tal-Madagaskar bil-ħsieb li jkompli jiżviluppa u possibbilment jitjieb il-qafas elettorali.

Aqsam dan l-artikolu: