Ewrobarometru: Stħarriġ juri appoġġ qawwi għall-euro, SURE u Faċilità ta' Rkupru u Reżiljenza

L-appoġġ pubbliku għall-euro huwa b'saħħtu u stabbli, skont l-aħħar stħarriġ tal-Ewrobarometru tal-Kummissjoni Ewropea. Maġġoranza ta' dawk li wieġbu (78%) fiż-żona tal-euro kollha jemmnu li l-euro huwa tajjeb għall-UE. Barra minn hekk, 69% minnhom iqisu l-euro bħala pożittiv għal pajjiżhom. Dawn ir-riżultati jindikaw it-tieni l-ogħla appoġġ għall-euro mill-bidu tal-istħarriġ annwali fl-2002. Dan l-istħarriġ tal-Ewrobarometru sar fost madwar 17,600 wieġeb mid-19-il stat membru taż-żona tal-euro, bejn il-25 ta’ Ottubru u d-9 ta’ Novembru 2021.

Ir-riżultati juru wkoll appoġġ qawwi għall-istrument Ewropew għall-appoġġ temporanju biex jittaffew ir-riskji tal-qgħad f’emerġenza (SURE), bi 82% ta’ dawk li wieġbu jaqblu dwar ir-rilevanza li jingħata self biex jgħin lill-istati membri jżommu lin-nies fl-impjieg. Bl-istess mod, l-appoġġ finanzjarju pprovdut mill-Faċilità għall-Irkupru u r-Reżiljenza (RRF) kien ipperċepit b'mod pożittiv minn 77% ta' dawk li wieġbu. Fl-aħħar nett, 65% ta’ dawk li wieġbu kienu favur l-abolizzjoni ta’ muniti taċ-ċenteżmu jew ta’ żewġ ċenteżmi permezz ta’ arrotondament obbligatorju tas-somma finali tax-xiri għall-eqreb ħames ċenteżmi. L-istħarriġ tal-Ewrobarometru huwa disponibbli hawn.

Aqsam dan l-artikolu: