Parlament Ewropew din il-ġimgħa: AKP, taħditiet fil-klima, il-baġits nazzjonali u kriżi tar-refuġjati Sirjani

It-28 sessjoni tal-Assemblea Parlamentari Konġunta AKP-UE ssir fi Strasburgu għall-ewwel tlett ijiem ta’ Diċembru. L-AKP huwa magħmul minn 79 stat Afrikan, tal-Karibew u tal-Paċifiku. Fost il-kwistjonijiet li se jiġu diskussi hemm it-tkabbir ekonomiku, ir-rikonċiljazzjoni ta’ wara l-kunflitt, l-Ebola u t-terroriżmu.
Mit-Tnejn 1 ta’ Diċembru, għall-ħmistax li ġejjin it-tliet films li qed jikkompetu għall-Premju tal-Films LUX se jintwerew ġewwa l-Parlament Ewropew. Il-MPE jistgħu jivvutaw għal rebbieħ sas-16 ta' Diċembru biċ-ċerimonja tal-premjazzjoni ssir fi Strasburgu l-għada. Il-Konferenza tan-Nazzjonijiet Uniti dwar it-Tibdil fil-Klima, jew COP 20, tibda fl-1 ta' Diċembru. Delegazzjoni ta' MPE, immexxija mill-president tal-kumitat għall-ambjent tal-Parlament Giovanni La Via (PPE, l-Italja), se tipparteċipa fil-konferenza. Il-COP 20 tgħaqqad lill-mexxejja dinjija f'Lima bil-għan li jintlaħaq ftehim ġdid ta' tnaqqis tal-emissjonijiet wara l-2020.
Intant fi Brussell l-MEPs se jiddiskutu l-prijoritajiet tat-tkabbir ekonomiku mal-Kummissarji Ewropej Valdis Dombrovskis, Pierre Moscovici u Marianne Thyssen waqt il-laqgħa konġunta tat-Tlieta (2 ta’ Diċembru) tal-kumitati tal-affarijiet ekonomiċi u tal-impjiegi tal-Parlament. Il-kumitat għall-affarijiet ekonomiċi se jiddiskuti wkoll il-fehma tal-Kummissjoni dwar l-abbozzi tal-baġits tal-2015 tal-pajjiżi taż-żona tal-euro mal-Kummissarju għall-Affarijiet Ekonomiċi u Finanzjarji Moscovici.

It-Tnejn wara nofsinhar ir-rebbieħa tal-Premju taż-Żgħażagħ Karlu Manju ta’ din is-sena se jippreżentaw il-proġetti tagħhom lill-kumitat tal-kultura u l-edukazzjoni.
Il-membri tal-kumitat tal-affarijiet barranin jiltaqgħu mal-eks magnat taż-żejt Russu Mikhail Khodorkovsky nhar it-Tlieta wara nofsinhar. Meħlus mill-ħabs f'Diċembru 2013 u rikonoxxut minn Amnesty International bħala priġunier tal-kuxjenza, se jiddiskuti s-sitwazzjoni tad-drittijiet tal-bniedem fir-Russja. Wara l-MPE se jiltaqgħu mal-Prim Ministru Libaniż Tammam Salam biex jiddiskutu l-kriżi umanitarja li qed tiżvolġi b’riżultat tal-kunflitt fis-Sirja.

Nhar it-Tlieta wkoll laqgħa konġunta tal-kumitati tal-libertajiet ċivili u tad-drittijiet tan-nisa se tiddiskuti kif jiġi ttrattat it-traffikar tal-bnedmin. Uffiċjali kemm mill-UE kif ukoll min-NU se jippreżentaw rapporti dwar il-kwistjoni.
Waqt il-laqgħa konġunta tal-Erbgħa tal-kumitat għall-affarijiet barranin u s-sottokumitat dwar id-drittijiet tal-bniedem l-MEPs se jiddiskutu kif jipproteġu aħjar it-tfal f'kunflitti armati u jwaqqfu r-reklutaġġ ta' suldati tfal.