#SiliconValley: Manfred Weber jispjega l-politika tal-UE fil-Silicon Valley

“Iktar Ewropa, s'issa, dejjem kienet ir-rispons ċar f'sitwazzjonijiet ta' kriżi. Madankollu, illum m'għandniex bżonn aktar jew inqas Ewropa imma Ewropa aktar intelliġenti. Nistgħu nagħmlu dan billi nissuġġerixxu politiki għaqlija biex niġġieldu l-populiżmu li qed jiżdied fl-Ewropa, pereżempju, biex niġġieldu l-egoiżmu nazzjonali għal żmien qasir u biex toffri orjentazzjoni differenti għall-futur. Ewropa aktar intelliġenti teħtieġ aktar identità, ibbażata fuq kultura ta’ valuri komuni, aktar kapaċitajiet ta’ implimentazzjoni u trid tagħti riżultati aħjar.” Dawn kienu l-messaġġi ewlenin taċ-Ċermen tal-Grupp tal-PPE, Manfred Weber MEP, waqt żjara ta’ tlett ijiem f’Kalifornja fejn ipparteċipa wkoll f’diskussjoni dwar il-futur tal-Ewropa li saret fl-Istitut tal-Istudji Ewropej fl-Università ta’ Berkeley.

“L-Ewropa trid tkun kbira f’affarijiet kbar, imma żgħira f’affarijiet żgħar. U Ewropa aktar intelliġenti teħtieġ ambizzjoni ġdida: assertività, speċjalment f’dak li għandu x’jaqsam mal-ekonomija, is-sigurtà u t-tradizzjonijiet kulturali”, kompla Weber, li ltaqa’ wkoll f’Silicon Valley mal-Kap Eżekuttiv ta’ Google Sundar Pichai u mar-rappreżentanti ta’ Facebook, Amazon u Uber.

L-għan tal-laqgħat differenti kien skambju reċiproku ta' opinjonijiet dwar mudelli finanzjarji tal-industrija tat-teknoloġija għolja minn naħa, u dwar il-leġiżlazzjoni Ewropea li tirregola l-operat tal-kumpaniji tat-teknoloġija għolja min-naħa l-oħra. Id-diskussjonijiet inkludew kwistjonijiet konkreti bħall-każ tal-antitrust ta’ Google u kwistjonijiet ta’ protezzjoni tad-dejta tal-konsumatur.

Iċ-Ċermen tal-Grupp tal-PPE ppreżenta l-isfidi li qed tiffaċċja l-Ewropa llum bħall-migrazzjoni, is-sigurtà, il-kompetittività, l-istabbiltà tal-Euro, il-ġlieda kontra l-qgħad. "Quddiem dawn l-isfidi, l-Ewropa m'għandhiex tibqa' taġixxi bħala fire extinguisher iżda bħala attur globali intelliġenti. Huwa l-għan tagħna li l-Unjoni Ewropea tafferma ruħha bħala komunità ta' valuri f'dinja inċerta. Dan ikun l-uniku mod kif l-Ewropa tista' ibqgħu kompetittivi, anke f’dinja diġitali”, qal Weber waqt it-taħditiet tiegħu mar-rappreżentanti ta’ Google, Facebook u Amazon. Irrimarka li leġiżlazzjoni bħar-regoli Ewropej il-ġodda dwar il-protezzjoni tad-dejta tista’ tipprovdi l-qafas meħtieġ. "Kull min irid jagħmel negozju fl-Ewropa għandu jirrispetta r-regoli tagħna", temm Weber.

Aqsam dan l-artikolu: