Id-dipendenza tal-enerġija tal-UE: Fatti u figuri

L-ispiża tad-dipendenza fuq l-enerġija
L-UE timporta 53% tal-enerġija li tikkonsma, inklużi kważi 90% taż-żejt mhux raffinat tagħha, 66% tal-gass naturali tagħha u 42% tal-fjuwils solidi tagħha bħall-faħam. Fl-2013 il-kont għall-enerġija esterna kien jammonta għal madwar €400 biljun.

L-Ewropa hija wkoll dipendenti ħafna fuq fornitur wieħed, jiġifieri r-Russja, responsabbli għal terz tal-importazzjonijiet taż-żejt, 39% tal-gass u 26% tal-fjuwils solidi. Sitt pajjiżi tal-UE jiddependu mir-Russja bħala l-fornitur għall-importazzjonijiet kollha tal-gass tagħhom.
Lejn żieda fis-sigurtà tal-enerġija

L-UE issa qed tfittex li tnaqqas din id-dipendenza billi tiddiversifika s-sorsi u l-fornituri tal-enerġija, tnaqqas il-konsum tal-enerġija, tagħti spinta lill-produzzjoni tal-enerġija u l-kooperazzjoni bejn il-pajjiżi u tinvesti f’enerġiji rinnovabbli. Dawn l-inizjattivi u oħrajn ġew kollha deskritti fl-istrateġija Ewropea tas-sigurtà tal-enerġija ppreżentata mill-Kummissjoni f'Mejju u diskussa mill-kumitat tal-industrija tal-Parlament fit-22 ta' Lulju. Il-kumitat se jkun qed iżomm għajnejh mill-qrib fuq l-istrateġija. Il-President tal-Kumitat Jerzy Buzek, membru Pollakk tal-grupp PPE, qal fi tmiem id-diskussjoni fit-22 ta’ Lulju: “Is-sigurtà tal-enerġija se jkollha rwol prominenti fil-ħidma tal-kumitat fix-xhur li ġejjin. Din il-kwistjoni hija ta’ importanza kruċjali għalina lkoll.”