Il-Kunsill illum (2 ta' Marzu) iddeċieda li jimponi miżuri restrittivi fuq erba' individwi Russi responsabbli għal ksur serju tad-drittijiet tal-bniedem, inklużi arresti u detenzjonijiet arbitrarji, kif ukoll repressjoni mifruxa u sistematika tal-libertà ta' għaqda paċifika u ta' assoċjazzjoni, u libertà ta' opinjoni u espressjoni fir-Russja.

Alexander Bastrykin, kap tal-Kumitat Investigattiv tal-Federazzjoni Russa, Igor Krasnov, il-Prosekutur Ġenerali, Viktor Zolotov, kap tal-Gwardja Nazzjonali, u Alexander Kalashnikov, kap tas-Servizz Federali tal-Ħabs ġew elenkati dwar ir-rwoli tagħhom fl-arrest arbitrarju , il-prosekuzzjoni u s-sentenza ta’ Alexei Navalny, kif ukoll ir-repressjoni ta’ protesti paċifiċi b’rabta mat-trattament illegali tiegħu.

Din hija l-ewwel darba li l-UE timponi sanzjonijiet fil-qafas tar-Reġim Globali tas-Sanzjonijiet tad-Drittijiet tal-Bniedem il-ġdid tal-UE li ġie stabbilit fis-7 ta’ Diċembru 2020. Ir-reġim tas-sanzjonijiet jippermetti lill-UE timmira lil dawk responsabbli għal atti bħal ġenoċidju, delitti kontra l-umanità u ksur serju ieħor tad-drittijiet tal-bniedem jew abbużi bħal tortura, skjavitù, qtil extraġudizzjarju, arresti jew detenzjonijiet arbitrarji.

Il-miżuri restrittivi li daħlu fis-seħħ illum b'segwitu għad-diskussjonijiet mill-Kunsill Affarijiet Barranin fit-22 ta' Frar 2021 jikkonsistu fi projbizzjoni tal-ivvjaġġar u ffriżar tal-assi. Barra minn hekk, persuni u entitajiet fl-UE huma pprojbiti milli jagħmlu fondi disponibbli għal dawk elenkati, jew direttament jew indirettament.

• Ġurnal Uffiċjali tal-UE: Deċiżjoni tal-Kunsill u Regolament ta’ Implimentazzjoni dwar miżuri restrittivi kontra vjolazzjonijiet u abbużi serji tad-drittijiet tal-bniedem (inkluża lista ta’ individwi sanzjonati)
• Kunsill Affarijiet Barranin, 22 ta' Frar 2021
• Ir-Russja: Dikjarazzjoni mir-Rappreżentant Għoli f'isem l-UE dwar l-arrest ta' Alexei Navalny mar-ritorn tiegħu, 18 ta' Jannar 2021
• L-UE tadotta reġim globali ta' sanzjonijiet għad-drittijiet tal-bniedem, stqarrija għall-istampa tas-7 ta' Diċembru 2020

Aqsam dan l-artikolu: