# COP22: Mill-ftehim għall-azzjoni - X'inhu f'riskju fit-taħditiet dwar il-klima f'#Marrakesh?

Fit-taħditiet dwar il-klima tal-COP21 f’Diċembru li għadda, 195 pajjiż adottaw il-ftehim ta’ Pariġi dwar it-tibdil fil-klima. L-ewwel ftehim dwar il-klima li jorbot universalment fid-dinja, jistabbilixxi pjan globali dwar kif tiġi limitata ż-żieda fit-temperaturi globali għal ferm taħt iż-2 °C 'il fuq mil-livelli preindustrijali. Il-ftehim daħal fis-seħħ aktar kmieni dan ix-xahar wara l-Parlament Ewropew ta l-kunsens tiegħu għar-ratifika tal-UE.
Din il-ġimgħa delegazzjoni ta' 12-il MPE mmexxija minn Giovanni La Via, president tal-kumitat tal-ambjent tal-Parlament, tieħu sehem fil-konferenza COP22 f'Marrakexx. Miguel Arias Cañete, il-Kummissarju Ewropew responsabbli għall-azzjoni klimatika, se jgħarraf lid-delegazzjoni kuljum. Il-MPE se jieħdu sehem ukoll f'taħditiet ma' NGOs, industrija u delegazzjonijiet minn diversi pajjiżi.

COP22: 'COP ta' azzjoni'
Il-fokus tar-rawnd ta' taħditiet ta' din il-ġimgħa se jkun fuq l-implimentazzjoni tal-ftehim ta' Pariġi. Id-delegati se jaħdmu biex jagħmlu l-pjanijiet nazzjonali dwar il-klima kemm jista’ jkun ċari u trasparenti, u biex jiżguraw li l-azzjonijiet meħuda jkunu traċċabbli u li jintużaw metodi ta’ rappurtar standardizzati. Se jkun hemm ukoll diskussjonijiet dwar azzjoni msaħħa qabel l-2020.

Bħala parti mill-ftehim ta’ Pariġi, il-pajjiżi żviluppati wiegħdu li jimmobilizzaw mill-inqas $100 biljun fis-sena f’finanzjament għall-klima għall-pajjiżi li qed jiżviluppaw sal-2020. Bil-għan li jwettqu l-impenji meħuda, in-negozjati f’Marrakexx se jduru madwar min għandu jħallas għal dawn il-fondi u kif għandhom jintużaw. Se jkun hemm ukoll diskussjonijiet dwar il-ħtieġa għal aktar appoġġ għall-pajjiżi li qed jiżviluppaw f’termini ta’ teknoloġija u bini ta’ kapaċità.Aktar informazzjoni