Parlament Ewropew jagħti ġieħ lill Nelson Mandela

Il-bnadar tal-UE ilhom ittajru b’nofs l-asta fil-Parlament Ewropew b’ġieħ lil Nelson Mandela li miet fl-età ta’ 95 sena fil-5 ta’ Diċembru. Meta tkellem wara l-mewt ta' Mandela, il-President tal-Parlament Ewropew Martin Schulz qal: "L-Afrika t'Isfel illum titlef lil missierha, id-dinja titlef eroj. Jiena nagħti ġieħ lil wieħed mill-akbar bnedmin ta' żmienna." Mandela kien l-ewwel reċipjent tal-Premju Sakharov tal-Parlament għal-Libertà tal-Ħsieb.

Mandela żar il-Parlament Ewropew f’Ġunju tal-1990, xhur biss wara li nħeles mill-ħabs, biex jirċievi l-Premju Sakharov tal-1988. Bħal għadd ta’ riċevituri oħra matul is-snin, ma setax jattendi għaċ-ċerimonja tal-premjazzjoni fl-1988 peress li kien mitfugħ il-ħabs mir-reġim tal-apartheid.

“Permezz tat-tmexxija u l-eżempju personali tiegħu, Nelson Mandela ta tifsira ġdida lil kliem bħal libertà, ugwaljanza, ġustizzja, rikonċiljazzjoni u maħfra,” qal Schulz.

il-Parlament Ewropew u l-Afrika t'Isfel

Ir-relazzjonijiet tal-Parlament Ewropew mal-Parlament tal-Afrika t'Isfel ġew iffriżati matul is-snin tal-apartheid. Il-Parlament Ewropew ħoloq delegazzjoni għar-relazzjonijiet mal-Afrika t'Isfel fl-1994, is-sena tal-elezzjonijiet li mmarkaw it-tmiem tal-apartheid.

Aqsam dan l-artikolu: