Parlament Ewropew din il-ġimgħa: NSA, Trojka, eCall, elezzjoni tal-president il-ġdid tal-Kummissjoni

Il-kumitati parlamentari din il-ġimgħa (10-14 ta’ Frar) se jivvutaw dwar rapport dwar kif is-sorveljanza tal-NSA affettwat id-drittijiet fundamentali tal-Ewropej, regoli li jiċċaraw il-kundizzjonijiet għax-xiri ta’ pakkett tal-ivvjaġġar u proposta biex il-karozzi jiġu mgħammra bis-sistema ta’ e-call li ssalva l-ħajja. . Sadanittant il-MPE se jkomplu wkoll l-inkjesta tagħhom dwar l-impatt tad-deċiżjonijiet tat-Trojka fuq il-pajjiżi ta’ salvataġġ.

Fit-12 ta' Frar il-kumitat tal-libertà ċivili jivvota dwar ir-rapport tiegħu dwar l-inkjesta tal-PE dwar is-sorveljanza tal-NSA tal-Ewropej. Miżuri li għandhom jiġu approvati jistgħu jinkludu s-sospensjoni tal-ftehimiet internazzjonali dwar l-iskambju tad-dejta u taħditiet kummerċjali mal-Istati Uniti u aktar protezzjoni għall-whistle-blowers u l-ġurnalisti.
Il-kumitat ekonomiku se jiddiskuti l-ħidma tat-Trojka ma' Benoît Coeuré, membru tal-bord eżekuttiv tal-Bank Ċentrali Ewropew, nhar il-Ħamis. Dakinhar ukoll il-kumitat tax-xogħol jivvota dwar l-impatt tad-deċiżjonijiet tat-Trojka fuq l-impjiegi, id-drittijiet tal-ħaddiema u l-benesseri soċjali. In-nies komuni kellhom il-possibbiltà li jikkontribwixxu għal rapport parlamentari dwar it-Trojka permezz ta’ LinkedIn.

Regoli ġodda biex jissaħħu d-drittijiet tal-konsumaturi meta jixtru pakkett tal-ivvjaġġar se jiġu vvutati mill-kumitat tas-suq intern fil-11 ta’ Frar. Dan jista' jinkludi garanzija ta' ripatrijazzjoni u dritt ta' rtirar ta' 24 siegħa wara l-ibbukkjar onlajn.
Il-karozzi l-ġodda kollha se jkollhom bżonn ikunu mgħammra b'e-call minn Ottubru 2015, skont regoli ġodda li qed jiġu vvutati mill-kumitat tas-suq intern fil-11 ta' Frar. E-call hija sistema li awtomatikament iċempel lis-servizzi ta' emerġenza f'każ ta' ħabta.

Il-kumitat tad-drittijiet tal-bniedem jorganizza smigħ pubbliku fit-13 ta’ Frar dwar is-sitwazzjoni tal-ħaddiema migranti li jinsabu fil-Qatar biex jgħinu fit-tħejjijiet għat-Tazza tad-Dinja tal-FIFA 2022.

Il-kumitat għall-affarijiet kostituzzjonali jivvota fil-11 ta' Frar dwar rapport dwar l-elezzjoni tal-president il-ġdid tal-Kummissjoni Ewropea wara l-elezzjonijiet Ewropej f'Mejju. L-MEPs aktarx jipproponu li l-mexxejja tal-UE mhux biss għandhom iqisu r-riżultati tal-elezzjoni meta jipproponu kandidat għal President tal-Kummissjoni, iżda wkoll li wħud mill-kummissarji l-ġodda għandhom jintgħażlu minn fost il-MPE li għadhom kif ġew eletti.
Fil-11 ta’ Frar ukoll, fadal biss 100 jum qabel jibdew l-elezzjonijiet Ewropej fit-22 ta’ Mejju. Biex issir taf meta tista' tivvota f'pajjiżek, għafas hawn għall-websajt tal-elezzjoni.