Libja: L-UE ssaħħaħ l-assistenza għal emerġenza ta' għargħar

L-UE tkompli tappoġġja l-għoti ta' assistenza umanitarja lil-Libja permezz tal-Mekkaniżmu tal-UE għall-Protezzjoni Ċivili. Offerti ġodda mill-Istati Membri tal-UE jinkludu: tim mediku ta' 53 persuna minn Franza; oġġetti ta’ kenn, makkinarju tqil, inklużi trakkijiet għat-tneħħija tas-sejjieħ, tim wieħed speċjalizzat ta’ għadis bi tliet dgħajjes zodiac u żewġ vetturi tat-trasport, u żewġ ħelikopters ta’ tfittxija u salvataġġ mill-Italja; tim wieħed ta' kompetenza teknika, inklużi esperti tal-IT, tal-loġistika u tal-mapping mill-Olanda.

Dawn l-offerti jiġu flimkien mal-assistenza diġà pprovduta mill-Ġermanja, ir-Rumanija u l-Finlandja fil-forma ta’ oġġetti ta’ kenn, ġeneraturi, oġġetti tal-ikel, kif ukoll tined tal-isptar u tankijiet tal-ilma mgħoddija permezz tal-Mekkaniżmu. Barra minn hekk, l-UE ħarġet ilbieraħ €500,000 inizjali f'fondi umanitarji biex jiġu indirizzati l-aktar bżonnijiet urġenti tan-nies fil-Libja milquta mill-impatt tat-Tempesta Daniel.

Esperti tal-għajnuna umanitarja tal-UE qed jiġu skjerati fuq il-post biex jivvalutaw malajr il-ħtiġijiet umanitarji emerġenti fuq il-post. Iċ-Ċentru ta' Koordinazzjoni ta' Rispons ta' Emerġenza tal-UE jinsab lest li jikkoordina aktar offerti ta' assistenza.

Il-Kummissarju għall-Ġestjoni tal-Kriżijiet Janez Lenarčič (isaffru) qal: “L-emerġenza tal-għargħar fil-Libja qanqlet appoġġ fil-pront mill-istati membri tal-UE. Offerti ġodda minn Franza, l-Italja u l-Olanda ta’ persunal u tagħmir mediku, dgħajjes tas-salvataġġ, ħelikopters u għajnuna vitali oħra saru disponibbli biex tissaħħaħ ir-rispons. Nirringrazzja lill-istati membri kollha tal-UE li qed jagħtu l-appoġġ ġeneruż tagħhom u qed jgħinu biex isalvaw ħajjiet f’din l-emerġenza kritika.”

Aqsam dan l-artikolu: