L-id il-leminija tal-Prim Ministru tal-Portugall jieqfu minħabba akkuża ta’ abbuż

Wara li ġie akkużat formalment b’abbuż, Miguel Alves, l-id il-leminija tal-Prim Ministru Soċjalista Portugiż Antonio Costa, irriżenja minn Segretarju tal-Istat.

Alves, l-eks Sindku fil-muniċipalità Portugiża tat-Tramuntana Caminha ilu taħt investigazzjoni mill-2019, iżda Costa ħatritu Segretarju tal-Istat assistent għall-Prim Ministru sentejn ilu.

Il-kritiċi ppuntaw subgħajhom lejn Costa talli ħatar lil Alves waqt li kien qed jiġi investigat.

Nhar il-Ħamis, il-prosekuturi pubbliċi tal-pajjiż iddikjaraw li kienu akkużawh uffiċjalment.

Alves kiteb lil Costa jirriżenja u qal li ma setax jibqa’ fil-gvern wara li ġie akkużat mill-prosekuturi pubbliċi. Costa aċċetta r-riżenja ta’ Alves u rringrazzjah.

Alves sostna li l-akkużi kienu bbażati fuq ġrajjiet li seħħew fl-2015 u fl-2016, meta kien sindku ta’ Caminha.

Publico irrapporta li l-akkużi kienu relatati ma’ kuntratti li ffirma sabiex jiffavorixxi kumpanija li hija proprjetà u kkontrollata minn Sindku Soċjalista ieħor.

reklam

Din hija parti minn investigazzjoni li għadha għaddejja dwar korruzzjoni u abbużi ta’ poter minn mexxejja u organizzazzjonijiet fiż-żona.

Publico jsostni li Caminha ħallas €300,000 f’kera biex jiffinanzja l-bini ta’ ċentru ta’ esibizzjoni waqt li Alves kien fil-poter. Iċ-ċentru għad irid jinbena.

Alves stqarr li kellu kuxjenza safja u kien “assolutament konvint” mil-legalità “tad-deċiżjonijiet (tiegħu) kollha”.

Aqsam dan l-artikolu: